Balada Meme Cewe-Cowo Harus Kerja Keras

Belakangan ini lagi musim meme-memean soal kenape cewe harus kerja, kenape cowo harus kerja keras...

Awalnye sih dari satu tweet seorang selebtwit, yang bilang kalo cewe harus kerja karena cowo kagak tau bedanye lipstik 50K dan 500K. Gue pun sempet share twit yang udeh dijadiin meme tersebut yang kagak sengaja nemu di Path.

Gue kira becandaan tersebut cuma sehari aje rame. Jangankan Path, Facebook dan Twitter pun rame banget soal begonoan.

Ade yang bilang...

"Cowo harus kerja keras karena cewe kagak tau bedanye pijitan 50K dan 500K"
"Cowo harus kerja keras karena cewe bisa bedain mane Esklas dan Espass"
"Cowo harus kerja keras karena cewe kagak tau mane Lego 50K dan 500K"

Dan seterusnye... ade banyak banget sih, coy.

Namun, meme tersebut harusnye kagak hanya sekadar becandaan lho. Harus menjadi refleksi diri, khususnye kaum Adam.

Wahai kalian kaum Adam, mulai sekarang janganlah kalian males-malesan belajar. Jangan males-malesan kerja. Karena kalian bakal jadi orang yang bakal menghidupi istri dan anak-anak.

Inget lho, kalo udeh punye istri, kalian kudu siap-siap ngeluarin duit buat kebutuhan personal doski. Beli make up laaah, bajulah... apalah....

Pengen punye istri cantik dan terawat? Ya kasi materi lebih buat doski merawat diri, biar kayak model.

"Yaelah, cantik natural aje sih, pake air wudhu juge udeh cukup!"

Nah, masalahnye kagak semua orang cukup dengan air wudhu buat bikin muke kinclong! Inget, cuci muka tuh yang bener pake sabun muka, kagak cuma aer (udeh gue buktiin). Ape lagi cewe, setelah seharian pake make up, ya kudu bersihin muke pake milk cleanser lah, sabun khusus lah, krem malem lah, dan laennye. Kagak semua cewe ditakdirkan ngerawat dirinye cukup menjaga air wudhu. Polusi di Jakarta aje gila-gilaan, kebayang kagak sih kalo sehari kagak cuci muke pake cleanser atau sabun muke?

Semuanye pake duit, kagak? Ya pake! Meski ade beberape jenis cewe yang pake begonoan yang mureh... dan ade cewe yang pake begonoan dari dokter langsung (biasanye lebih muahal). Nah kalo kebetulan kalian dapetin cewe yang biasa-biasa aje tapi kalian pengen tuh cewe lebih cakepan dikit, ya bermodal lah dikit, kasi kocek khusus buat ke dokter kulit!

Terus kenape bisa ade meme, "Cewe harus kerja karena cowo kagak tau bedanye lipstik 50K dan 500K" ?

Itu meme sebenernye bisa jadi sindiran sekaligus motivasi buat kalian, wahai para cowo. It's okay kalian kagak bisa bedain lipstik, tapi kalian pasti tau dong bahwa sebuah barang ntu bagus atau kagaknye ya bisa kelihatan dari harganye?

Sindiran, buat kalian, mungkin para suami, yang mungkin masih males-malesan kerja sehingga rejekinye cuman segono-gono aje kagak nambah-nambah. Akhirnye si istri kerja, demi membeli ape yang diinginkan....

Motivasi, buat kalian, wahai para calon suami untuk tetep bekerja keras. Kagak bakalan percuma kok kalo kalian suka bekerja keras, toh kalian juge yang bakal seneng. Dan bangga juge dong kalo kalian nantinye bisa beliin make up mahal buat istri? Lipstik aje 500K, wah kalo mau penampilan si istri kayak artis mah, kudu modalin alat make up laennye, kagak cuman lipstik. Ade pondesyen, eyeliner, maskara, dan tetek bengek laennye.

Nanti pas nongkrong ame temen, kalian bisa pamer, "Gue kemaren abis nganter istri nih ke Plaza Senayan, beliin SKII, kalo istri kalian pake ape, bro?"

Heuheuheu.

Soal pijit-pijitan, cewe kagak bego-bego amat keleus. Kite tau kok bedanye pijitan 50K dan 500K. Tapi silakan tanggung sendiri dosanye....

Soal mainan 50K dan 500K macem Lego mah, kagak semua cewe bego, keleus. Gue bisa kok bedain mane Lego asli dan palsu...

Ape lagi? Helm mahal? Ban motor?

Sebenernye sih lebih baik, dari sisi cowo dan cewe, kagak saling menjatuhkan, "Mereka kagak tau XXX 50K dan 500K"

Lebih baik saling memotivasi, misal, "Cowo tuh harus kerja keras, biar si mertua tuh seneng lihat anaknye kagak sia-sia dikasi ke orang laen" (Entah ini memotivasi ape kagak hahaha).

Tambahan lagi, inget susu anak ntu mahal banget. Kemaren gue sempet dengerin curhatan salah satu Psikolog anak, kalo doski selalu menghabiskan duit bulanannye buat beli susu anak. Sekaleng bisa 250 ribuan. Seminggu satu kaleng. Nah, kebayang dong kudu berape duit kalian ngeluarin duit nanti?

Jadi, siap-siap aje, duit kalian bukan cuman dibelanjain buat make up, tapi susu anak juge.

Pade intinye, mau cewe kek mau cowo kek, kerja mah kerja aje. Kerja keras, hayok. Kalo kagak kerja, gimane mau menyambung hidup? Kecuali kalian punye warisan yang 70 turunan kagak abis-abis.

cewe kek cowo kek, kerja mah kerja aje kagak usah banyak alesan

"Tapi kan... cewe kagak wajib kerja, Nyet!"

Emang kagak wajib. Tapi jaman sekarang tuh yeee, cewe kebanyakan pade pengen punye duit sendiri. Pengen mandiri. Lagi pula, kerja kan kagak harus ninggalin anak. Kerja di rumah kan bisa. Dan dengan bekerja, cewe-cewe bakal bisa upgrade knowledge dan koneksi. Iye kagak?

Sekian dan terima ijab kabul!

NB: lipstik gue Maybeline 60 ribuan kok, jadi tenang aje kalo di sini ade jodoh gue yang bace, ente kagak usah kasi yang mahal-mahal. Mending mentahnye aje dah :)