Si Doel The Movie, Kagak Sesuai Ekspektasi?

Kalian #TimZaenab ape #TimSarah ? (Sumber Foto)

Hari kemaren, Kamis (2/8), gue berkesempetan untuk nongton pelem SI DOEL THE MOVIE. Gatel deh kepengen review aka mengulas SI DOEL THE MOVIE, bener-bener gatel!

Sebelomnye, perkenankan gue untuk memberikan alesan kenape gue mau nongton ni pelem:

1. Masa kecil gue diisi oleh serial SI DOEL di RCTI, walaupun gue kagak ngerti-ngerti amat ame serialnye (maklum dulu mah masih bocah).

2. Sebagai anak Betawi, gue merasa kudu banget nongton SI DOEL THE MOVIE, untuk menghargai kreator Betawi.

3. Karena sekarang gue kebanyakan mengisi waktu luang di rumah, gue jadi sering nyetel ulangan serial SI DOEL di RCTI. Gue sih belom nongton sampe tamat, karena cape banget kayanye kalo gue ikutin semuanye sampe tamat, secara alurnye tuh lambat banget kan. Isinye cuman soal kegiatan sehari-hari yang lempeng-lempeng aje gitu, kagak ada sesuatu yang bikin gue penasaran. Iye kagak, sih? Walau begitu, gue sangat apresiasi serialnye karena ceritanye masih logis aje gitu, kagak kayak sinetron yang ada di Indosiar tiap pagi wkwk. 

Pegimane dengan SI DOEL THE MOVIE, ape bener bakal sesuai dengan ekspektasi kite semuaaaaaaa???

Betewe monmaap nih mentemen kalo tulisan ini rada sepoy iler, wkwkwk.

Kalo mau tau awal cerita SI DOEL THE MOVIE kayak pegimane, yaaa sama kayak yang di awal trailer aje gitu. Pas Si Doel dan Bang Mandra mau berangkat ke Belanda. Isinye cuman adegan packing - pamit ame Nyak - cuss berangkat. Diselingi oleh celotehan Bang Mandra yang emang kocak banget, bahkan sampe akhir pelem.

Terus pas nyampe di Belanda, ngapain? Jalan-jalan? Ya, jalan-jalan, tapi tujuan utama Doel sebenernye pengen bantuin Hans untuk menyiapkan Tong Tong Fair. Namun entah kenape, keindahan kota Amsterdam semacem kurang maksimal digali oleh tim pelem ini, jadi biasa aje sih gue mah liatnye. Isinye cuman gitu-gitu doang, padahal gue yakin banyak spot keren laen di Amsterdam yang bisa ditunjukin. Entah karena keterbatasan izin yang didapetin, budget yang kagak memungkinkan, atau lagi dikejar deadline banget????

Pas si Doel dateng ke salah satu museum pun, entah kenape penongton kagak dikasi liat keseruan isi museum walau sebentar aje. Bener-bener straight to the point, persis kayak di trailer. Jalan dikit, langsung.... oke, ketemu Sarah. Abis ketemu Sarah, ngapain? Ya ngobrol doang, Sarah yang banyak ngomong. Doel masih kayak dulu, kebanyakan diem, aksi pun minimal banget, kurang agresif dan inisiatif aje gitu kalo gue liat. Walau masih dimaklumi juge, mungkin doi masih kebanyakan diem karena ngerasa serba salah, terlebih doi sekarang udeh punye Zaenab dan udeh janji ke Nyak untuk kagak menemui Sarah yang udeh menghilang selama 14 tahun.

Sarah minta maap, Doel minta maap. Lalu saling memaapkan. Tapi apakah mereka sampe berpelukan mesra hingga ngewong? Ooooh, tidak pemirsaaah. Kagak ada adegan ho'oh dari pasangan yang masih saling mencintai dan lama LDR kagak jelas. Gue sih kalo jadi Sarah, kagak mau nahan-nahan, toh statusnye masih jadi BINI. Wkwkwk.

Terus bocah cowo yang ada di poster sape dah? Anaknye Doel, kah? Iye, anak Doel, namanye Doel juge. Terus ape bener Zaenab udeh jadi bini Bang Doel? Iye bener. Sarah tau si Zaenab udeh jadi bini lakinye? Tau bingits.

Tertarik nongton?

Lalu, ada drama ngenes apaan kalo ceritanye kayak begono? Kalo kalian ngarep ada PLOT TWIST, jangan deh! Karena kagak ada sama sekali PLOT TWIST. Gampang ketebak? OH, BANGET! Huuuu, sedih kagak sih looo. Pokonye kalo kalian udeh nongton sampe tengah, pasti bakal bisa nebak lah endingnye kayak pegimane. 

Jangan harap ada drama yang bikin gregetan, ape lagi bikin kalian berpikir keras. Kagak ada, cuy. Datar-datar aje pokonye. Dialog biasa aje. Malah kurang NYOOOSSS gitu.

Kecuali, dialog yang dilakuin ame Bang Mandra, wah, bagi gue Bang Mandra adalah penyelamat SI DOEL THE MOVIE dan layak digaji lebih tinggi dari pemaen laennye. Seriusan, karena pelem ini cuman greget di kelakuan Bang Mandra doang. Pas doi selfie tiap waktu demi bikin iri Atun (doi sering kirim poto ke WA soalnye, misal "Nih gue poto lagi di jalan" "Nih gue lagi di pinggir kali Amsterdam" dll), pas kedinginan di pesawat, adu bacot ame Hans, dll.

Apalah arti SI DOEL THE MOVIE tanpa Bang Mandra uwuwu :3

Pokonye menurut gue... SI DOEL THE MOVIE ntu kurang greget, macem PELEM RASA SINETRON INDONESIA. Dari sisi cerita, sinetron banget huhuhu. Gue berasa kayak nonton serial Si Doel di TV, Dunia Kebalik, atau Ojek Pengkolan, yang alurnye lambat dan ngebosenin. Sinematografi yang disajikan pun buat gue biasa aje, ya standar, kagak wah banget. 

MENGHIBUR? Dialog Bang Mandra bener-bener menghibur, serius. Suka banget pokonye!

Soal akting, gue akui AKTING SEMUA CAST KAGAK DIRAGUKAN. Akting mereka bener-bener alami banget keliatannye. Chemistry masih terjaga. Ya maklum lah, mereka kan pemaen asli serial Si Doel dulu, sampe berape taun coba mereka bareng-bareng. Seneng sih akhirnye bisa sama-sama lagi di dalam satu projek. Gue sih berharap ada pelem laen (selaen Si Doel The Movie), yang berisi mereka-mereka lagi.

SI DOEL THE MOVIE menurut salah satu netijen

PENGEN BERNOSTALGIA? Bagi gue sih silakan aje nongton SI DOEL THE MOVIE. Tapi jangan heran kalo isi bioskopnye kebanyakan emak-emak dan bapak-bapak, pade bawa anak pula. Kayak pas gue nongton tadi, kanan kiri depan belakang, semuanye pade bawa anak kecil. Maklumi aje kalo nanti di sebelah kalian ada emak-emak nongton sambil bikin susu atau ganti pampers wkwk.

MILLENIALS BANGET KAGAK, SIH? Buat gue sih, millenials yang terbiasa nongton pelem Hollywood atau drama Korea-Thailand, kalo nongton ini, bakal ngerasa biasa aje ame ceritanye. TAPI, kalo millenialsnye mereka-mereka yang jarang nongton bioskop, penggemar berat cast dari jaman serial Si Doel, yang jarang terpapar film bagus lokal atau non lokal, mungkin akan ngerasa pelem SI DOEL THE MOVIE waaah banget 😌

YANG HARUS DIAPRESIASI dari pelem SI DOEL THE MOVIE yakni usaha Om Rano Karno yang mau mengajak semua cast dari serial Si Doel untuk turut menjadi cast pelem ini, sehingga bisa menjadi salah satu DAYA TARIK TERBESAR, walaupun alur ceritanye biasa aje, hehe.

Sekian ulasan zuzur (#UZUR) alias review SI DOEL THE MOVIE ala Mpok Pina. Mohon maap kalo kejujuran ini bikin kalian ngerasa kzl wkwk.