Kejahatan Terselubung di dalam Media Tell Lie Vision #2

*lanjutan dari sini* 

Sebelom baca, mari kite nyanyi lagunye Naif yang berjudul TELEVISI!

Nah, kemaren kan gue udeh ngomongin soal ini sampe poin kedua, dan sekarang gue mau ngelanjutin cerita lagi...

Ketiga. Nyadar kagak sih kalo berita itu makin buruk isinye makin rame orang yang ngebicarain? Misalnye, waktu kasus Manohara dulu. Beuh, dalem sebulan TV ngomongin Manohara mulu. Trus kasus Raffi Ahmad yang katanye pake narkoba dan sampe sekarang diomongin mulu di infotainment. Atau coba perhatiin, kalo ada kejadian gempa dan tsunami gede, beuh pasti di stasiun TV pada berlomba-lomba untuk dapetin dan menayangkan beritanye everytime.

Makkk, aye masup tipi, makk!!

Sebenernye kagak cuman TV doang sih. Semua media pun sama. Ya maklumi aje ye, soalnye media itu punya prinsip : BAD NEWS IS A GOOD NEWS. 

Pada kenyataannye, emang kebanyakan orang sukanye ngeliat dan bicarain yang buruk-buruk. Dan semua acara TV, kebanyakan bakal dapet rating & share tinggi kalo isinye berbau musibah, kejahatan, misteri, seks/pornografi, kecelakaan, kematian, dan sebagainye.

Dalam pembuatan berita pun ye, sering juga loh wartawan jadi provokator biar orang-orang pada makin brutal. Misalnye lagi ada tawuran antar mahasiswa nih, nah suka ada wartawan yang ngomong kagak-kagak kepada para mahasiswanye dan menyuruh main bakar-bakaran ban. Malah tuh ban sering juga  udeh disediain sama wartawannye sendiri. Karena ape? Ya berita tawuran kalo kagak ada bakar-bakaran atau ngerusakin barang, jadi kurang greget gitu.

Trus kalo misalnye di Papua ada berita tawuran, tapi kagak ada yang mati dan di Jakarta juga ada berita tawuran dan sampe ada yang mati. Nah di media TV atau laennye nih, pasti kebanyakan bakal lebih memilih berita yang terjadi di Jakarta atau minimal berada di Indonesia Bagian Barat untuk ditayangin. Atau, kalopun ada berita yang berasal dari daerah-daerah terpencil di Indonesia Bagian Tengah dan Timur, pasti musti ada yang berbau bentrokan sampe banyak yang mati. 

Suka pantengin reality show atau acara jalan-jalan, kagak? Nah coba deh liat, pasti si talent nye selalu dapetin hal-hal yang kagak enakin. Misal, di dalem acara Tercemek-cemek di Terans Tipi dulu, pasti selalu ada kejutan. Ada yang talentnye kesurupan, talentnye pingsan, pas mobil jalan malem-malem ada penampakan setan,  dll. Kalo di dalem acara jalan-jalan, misalnye si talent jatuh dari becak, dimarahi preman, diculik pangeran kodok, dll.

Kata dosen gue sih, kalo bikin acara TV ya musti pake dramatis gitu, kagak boleh lurus-lurus aje. Musti dikasi bumbu penyedapnye. Halah, udeh kayak makanan aje. 

Keempat, masih seputar soal acara TV macem reality show. Mungkin udeh banyak yang tau lah ye kalo orang-orang di dalem reality show itu semuanye udeh ditentuin dan dibayar. Misal, di acara hipnotisnye si Uya Kuya. Aduh itu pembohongan gede banget. Sahabat gue kan dulu lagi maen ke salah satu ITC, eh taunye sama kru acara si Uya ditawarin buat jadi talent. Kalo mau, sahabat gue itu bakal dikasi duit 500 ribu dan disuruh baca skripnye. Untungnye sahabat gue punya iman yang kuat dan segera bergegas untuk menolak. Yaiyelah, sahabat gue kan anak tajir, duit segitu mah paling cuman bakal beli cukuran ketek di Singapur.

acara si Uya

Di acara Tercemek-cemek dulu, pernah ada temen SMP gue, namanye Debby. Eh pas jadi talent di acara itu, namanye masa berubah jadi Tiara? Dari situ gue ilfil sama Tercemek-cemek, gue kira itu beneran eh taunye bohongan juga! 

Ada juga acara Super Trap. Pernah ada kasus Super Trap yang mengerjai orang lain yang memakai WC Umum buatan di tempat pariwisata sampe alat kelamin dan bokong yang dijebak keliatan. Ya walaupun di blur, tapi tetep aje kelewatan, bayangin aje kalo kite yang jadi korban dan barang tersembunyi kite dipertontonkan sama banyak orang di lokasi syuting, yang ada juga MALU dan bakal ngomong ke kru ST kalo gambar kite kagak boleh ditayangin di TV.

Ihhh, ruang private kok dijadiin tempat buat ngejebak!

Tapi, beberapa orang yang dijebak, termasuk ibu dan bapak tua, entah kenape kok kagak protes gambarnye ditayangin? Yaiyelaaah, kan udeh dibayar! Yap, bener, selidik punya selidik, rata-rata orang yang dijebak di acara itu adalah orang bayaran. Cuwape, deh! Para krunye ngaku soal itu pas ditegur sama Komisi Penyiaran Indonesia. Yah, kecewa ah! Jadi males nonton ST lagi!

Kelima, pada semua media, khususnye TV, sebenernye ada tindak kekerasan yang kagak kite sadari. Namanye kekerasan simbolik. Kayak ape, tuh? Gampang!

Cewe cantik itu identiknye kayak ape, hayok? Pasti kebanyakan yang badannye langsing, kulit putih, rambutnye lurus panjang item, bulu matanye lentik, dan laen-laen.

Cowo ganteng itu identiknye kayak ape, hayok? Yang sixpack, kah?

Kalo ada yang berpikiran kayak diatas, itu namanye kalian udeh jadi korban kekerasan simbolik dari media. Kekerasan tersebut terjadi dari apa yang kita nonton, mulai sinetron, iklan, infotainment, dll.

Liat aje iklan lotion, pasti ujung-ujungnye memerlihatkan cewe yang badannye putih. Dan bodohnye, pernah gue nonton ada iklan lotion tapi yang maen Ceribel. Katanye sih tuh lotion bisa bikin putih dan cerah. Eh plis deh, si Ceribel kan rata-rata oriental, udeh dari sononye putih. Tanpa pake tuh lotion pun pasti tetep putih. Kalo mau bikin iklan yang katanye bikin putih, sekalian aje tuh pake model Rihanna.

Ya, bener. Iklan itu kebanyakan ajang pembohongan. Makanye, gue benci sama yang namanye iklan. Tapi gue anak iklan dan pernah beriklan. Halah!

Cape deh!

Belom lagi masalah iklan shampo, kenape sih selalu pake model yang rambutnye lurus item panjang gitu? Kok gue kagak pernah liat iklan shampo tapi cewenye berambut keriting, keribo, atau cepak? Gara-gara iklan shampo, banyak temen gue yang jadi korban iklan. Yang rambutnye keriting, pada dibonding. Padahal gue pengen banget punya rambut keriting. Andai kite bisa bertukar rambut, ye... 

Ya inilah kenyataan yang terjadi di dalam dunia televisi. TV adalah salah 1 media yang emang pengaruhnye lebih gede daripada media laen. Karena TV memiliki komunikasi audio visual dan hampir semua orang kagak luput dari TV. Sebagai penikmat media, kite jangan cuman terima gitu aje sama yang ditonton. Coba lah untuk kritis, mencari sumber info dari media laen, dan pertebal iman. Biar kagak dibego-begoin sama media, khususnye TV. Karena pasti selalu ada kepentingan dibalik media itu. Dan inget, kagak cuman media di Indonesia, tapi di seluruh dunia. Semua media di dunia pasti selalu ada kepentingan terselubung dari para pengusaha, politisi, selebriti, dan laennye.

Oke, sekian cerita soal TV dari gue. Ditunggu tanggapannye, sob! 

Sumber Gambar :

http://gambargambarlucu.info/sampo-gagah-gemulai.html

http://sakaruhun.blogspot.com/2011/11/ringtone-oh-no-uya-kuya.html
http://indonesiarayanews.com/news/hiburan/11-27-2012-20-41/super-trap-edisi-toilet-ngaku-salah
http://kapita-fikom-untar-915080031.blogspot.com/2011/09/iklan-kekerasan-simbolik.html