#UZUR : Film A Quiet Place, Bikin Emosi Jiwa!

Film A Quiet Place yang sangat rekomen untuk kalian!

Dan rubrik #UZUR alias Ulasan zuZUR alias review kembali hadir di blog gue. Kali ini gue mau mengulas atau review film A Quiet Place, yang menurut gue film horor ini unik sih ide utamanye.

Berikut trailer film A Quiet Place, mungkin bisa ditonton dulu, brosis.

Jadi ceritanye ada satu keluarga yang tinggal di suatu kota kecil pada tahun 2020. Kota tersebut sangat sunyi, sepi, aku benciii... #yaelah. Kayaknye sih penduduknye udeh pade mati dimangsa oleh monster. Loh kok bisa? Itu monster kenape bisa muncul? Dari mane ntu si monster?

Di film A Quiet Place sendiri kagak dijabarin dari mane si monster ntu dateng. Yang jelas, si monster yang bisa terbang dan ukurannye gede banget ini, hadir di seluruh dunia. Monster ini buta dan benci banget ame yang namanye suara. Oleh karena ntu, banyak penduduk dunia yang mati akibat dimakan ame si monster.

Ya bayangin aje, mane mungkin kite kagak bisa bersuara bahkan menciptakan suara? Duh, kagak kebayang deh kalo kudu puasa ngomong seumur hidup! Kagak bisa ghibahin selebgram dong?

Anak cewe Bang Udin yang paling nyebelin!!!

Penonton pun diajak untuk melihat inovasi si keluarga yang masih hidup ntu. Yes, di film ini penonton cuma fokus untuk melihat cerita salah satu keluarga. Sebut aje keluarga Bang Udin, yang berisikan Mpok Minah sang istri, anak sulung yang tuna rungu bernama Atun, Amin si abang paling gede, Dadang, dan bayi yang baru lahir di tengah cerita bernama Doni.

*waduh, ini keluarga bule malah gue namain dengan nama penuh kearifan lokal HAHAHA*

Emosi gue pun membuncah tatkala di sebuah minimarket tak bertuan si Atun ngasi mainan pesawat terbang yang bisa bersuara ke Dadang, adeknye yang berusia 4 tahun. Padahal Bang Udin udeh melarang ntu mainan untuk dibawa ke rumah. Soalnye ntu mainan kan bersuara, kalo dimainin yang ada mengundang si monster, dan mereka sekeluarga bisa mati.

Emosi gue juge kembali membuncah pas si Atun lagi-lagi bikin masalah gede, sehingga Bang Udin kagak bisa selamat. Kenape? Ada deeeeh, biar kalian penasaran wkwk.

Salah satu anak Bang Udin yang lagi nontonin babehnye gelut ame si monster.

Tapi yang paling ngeselin sih, si Bang Udin dan bininye kenape sampe punye anak lagi segala? Gue tuh ngeri banget tau kagaaaak, bukan ape-ape kalo ada bayi kan udeh pasti rumah bakal berisi ame tangisan bayi kan. Bayi mereka yang bernama Doni, terpaksa ditidurin di dalem peti, demi bisa meredam suara tangisannye. Tentunye si bayi dipakein oksigen terlebih dahulu. Tapi tetep aje, hal ini kagak bikin si monster untuk kagak dateng ke rumah.

Proses lahiran yang dilakukan sendiri. Kagak kebayang kan gimane jadinye? 

Sebenernye sih gue agak bingung juge, kok dengan kondisi kayak gitu mereka bisa gituan? Gituan kan bisa bikin berisik! Mane pas gituan, crotnye di dalem lageeee. Yaelah nyusahin diri aje lu pade!

#KzlBangetAmeOrtuKayakGini

Dari film A Quiet Place pun, sebenernye penonton diajak untuk mengetahu cara mengusir si monster ntu. Yang paling seru sih, pas tau si keluarga berinovasi demi kelangsungan hidup. Misalnye, cara masaknye dengan cara mengkukus di tanah, ketimbang mengkukus pake panci pasti kan berisik.

Berikut alasan kenape gue suka dengan Film A Quiet Place :

1. Unik. Karena kalo film horor laen kan selalu dikasi sound effect (sfx) lebay nan mencekam gitu ye. Sedangkan di film A Quiet Place, sfx maupun backsoundnye dikit bener, sekitar 20% doanglah. Dari sini gue bisa tau bahwa untuk menakut-nakuti penonton, sebenernye kagak perlu sfx dan backsound lebay yang bikin telinga berdarah. Kalo berdarah, masalahnye kagak ada softex khusus ntu cuy.

2. Chemistry antar pemaen dapet banget. Aktingnye pun kagak perlu diragukan cuy. Btw ntu suami-istrinye ternyate beneran wkwk.

3. Sinematografi, sfx, dan musik bagus! Buat yang demen edit video, bisa pake referensi sinematografi film A Quiet Place.

4. Film ini mengajarkan kite untuk selalu kompak dan saling mengasihi dengan keluarga.

Yang bikin gue sebel ame Film A Quiet Place yakni :

1. Kurang logis. Udeh tau si monster kagak bakal bisa denger suara manusia di area deket air terjun, nah kenape kagak tinggal di deket air terjun aje sih? Jadi, antar anggota keluarga kagak perlu ngomong pake bahasa isyarat atau bisik-bisik lagi (kecuali kalo mau berkomunikasi ame si Atun).

2. Kagak diceritain asal muasal si monster yang hadir.

Overall sih, bagi gue film A Quiet Place sangat rekomen ditonton oleh kalian. Oh iyak, karena film ini sunyi, sehingga gue menyarankan untuk :

1. Kagak berisik, jangan sampe ada suara lo buka plastik atau batuk. Kalo lo batuk, mending jangan nongton ini dah, kesian ame penongton laen!

2. Nongton di bioskop yang sepi atau di jam sepi (misal jam 12 siang dan midnight). Kalo perlu sih, ambil aje yang premiere langsung.

Segitu aje sih #UZUR alias review film A Quiet Place dari gue. Semoga bisa jadi referensi temen-temen buat nongton film di akhir pekan nanti.

Ponten Film A Quiet Place : 8,5 / 10
Rekomen? : REKOMEN PARAH SEEEH KAGAK BAKAL NYESEL!

Sumber foto:
https://www.bristol247.com/whats-on/film/horror/a-quiet-place/
https://film.avclub.com/a-quiet-place-you-were-never-really-here-and-the-mons-1825055107
https://www.dudedaily.ca/a-quiet-place-review/
http://www.showbiz411.com/2018/04/03/review-a-quiet-place-notches-up-hollywood-couple-john-krasinski-and-emily-blunt-with-a-sublime-gem-of-horror